Pasiente ida tan rekupera ona husi COVID-19. Nune'e, númeru kazu rekuperadu aumenta ba 21

 

Profisionál saúde ida ne'ebé konfirmadu iha, loron 24 fulan kotuk, rekupera ona husi COVID-19, nune'e númeru kazu rekuperadu aumenta ba 21 (17 husi kazu konfirmadu no 4 husi kazu provável) no sei hela pasiente nain 7 mak sei iha izolamentu Vera-Cruz, anunsia Koordenadór Forsa Tarefa ba Prevensaun no Mitigasaun Surtu COVID-19, Sergio Lobo, iha atualizasaun dadus, kuarta-feira ne'e.

Entretantu, kazu foun la iha, kazu negativu mantén 622, hein rezultadu 92 no númeru ezame laboratóriu aumenta ba 738.

Porta-voz Sala Situasaun ne'e apela nafatin ba populasaun tomak atu kuidadu-an no hakbesik ba iha fasilidade saúde sira bainhira hetan sintoma moras respiratóriu ou moras seluk tanba problema ne'ebé ita hasoru laos deit COVID-19, maibe iha mós moras sira seluk ne'ebé rejista iha rai laran.

Sergio Lobo apela ba komunidade tomak atu kumpri nafatin regra distansiamentu sosiál no fíziku, hakmatek iha uma bainhira la presija sai, evita halibur malu no kontinua prátika ijiene pesoál liu-liu fase liman bebeik no uza máskara bainhira sai husi uma.

Ema ne'ebé sei hela iha konfinamentu obrigatóriu no autokonfinamentu hamutuk 173, autokuarentena iha munisípiu hamutuk 46, iha Díli la iha. Enkuantu, ema iha kuarentena obrigatóriu iha fasilidade Governu nian iha Díli hamutuk 38 no iha fasilidade Governu nian iha munisípiu hamutuk 89.

Alende ne'e, profisionál saúde ne'ebé sei hela iha kuarentena hamutuk 21 no ema ne'ebé liu ona loron sanulu resin haat iha kuarentena hamutuk 2059. Iha Díli 1639 no iha munisípiu sira seluk 420

Categoría Noticia