Númeru kazu negativu aumenta ba 750 husi rezultadu teste ne'ebé halo ona ba ema 854

 

Liuhosi konferénsia imprensa ne'ebé hala'o, iha sábadu ne'e, Koordenadór Forsa Tarefa ba Prevensaun no Mitigasaun Surtu COVID-19, relata katak númeru kazu negativu iha mudansa husi 692 ba 750 husi teste ne'ebé halo ona ba ema hamutuk 854 no sira ne'ebé sei hein rezultadu tun ba 80.

Enkuantu, kazu konfirmadu sei nafatin 24 ho rekuperadu 21 inklui provável 4 no hela ema nain 7 mak sei iha izolamentu Vera-Cruz.

Tuir dadus ohin loron nian, númeru ema sira ne'ebé sei hela iha kuarentena obrigatóriu no autokuarentena iha mudansa husi 135 ba 173. Alende, iha mós profisionál saúde hamutuk 45 mak hela iha kuarentena, hafoin fó atendimentu ba pasiente pozitivu COVID-19 iha izolamentu Sentru Saúde Vera-Cruz.

Entretantu, totál ema ne'ebé kompleta ona loron sanulu resin haat tantu iha konfinamentu obrigatóriu iha fasilidade Governu nian no mós autokonfinamentu iha uma hamutuk 2083. Iha Díli 1645 no iha munisípiu sira seluk hamutuk 438.

Iha oportunidade ne'e, porta-voz Sala Situasaun ne'e mós kontinua apela ba populasaun tomak atu kumpri nafatin regra distansiamentu fíziku mínimu metru ida, tur hakmatek iha uma, evita halibur malu, keta rona boatu no notísia husi fonte ne'ebé la lós, maibe rona no fiar deit informasaun sira ne'ebé sai husi konferénsia imprensa ne'ebé CIGC realiza lor-loron no kontinua prátika ijiene pesoál, liu-liu fase liman bebeik no liman labele kona-ba inus, matan ho ibun inklui uza máskara bainhira sai husi uma.

Categoría Noticia