Númeru kazu negativu aumenta ba 679 husi teste laboratóriu ne'ebé halo ona ba suspeitu hamutuk 764

 

Porta-voz Sentru Integradu Jestaun Krize, Odete Viegas, reafirma katak total númeru kumulativu ba teste laboratóriu ne'ebé halo to'o kinta-feira ne'e hamutuk 764, hein rezultadu 61, total kumulativu kazu konfirmadu mantén 24, kazu foun la iha, kazu negativu 679, kazu rekuperadu 21 husi konfirmadu 17 no provável 4 no kazu pozitivu sei iha ema nain 7 ne'ebé sei baixa iha izolamentu Vera-Cruz.

Entretantu, ema hamutuk 123 mak sei hela iha kuarentena obrigatória no autokuarentena. Husi númeru ne'e, iha Díli hamutuk ema nain 89 no iha munisípiu sira seluk hamutuk 34. Enkuantu, autokuarentena iha munisípiu sei iha ema 32 no Díli la iha.

Nafatin iha konferénsia imprensa, Odete Viegas, kontinua apela ba ema sira ne'ebé sai ona husi fatin kuarentena no ba pasiente rekuperadu sira ne'ebé reintegra ona ba sira nia família no komunidade atu nafatin mantén distánsia sosiál, fase liman beibeik, uza máskara karik moras no sai ba fatin públiku, evita halibur malu no bainhira mosu sintoma ruma tenki kontaktu ba númeru 119 ou hakbesik ba iha fasilidade saúde sira hodi hetan atendimentu husi pesoál saúde sira.

Diretora-Jerál ba Prestasaun Servisu Saúde Ministériu Saúde ne'e mós fó hanoin fila-fali ba públiku kona-ba krize ébola ne'ebé akontese iha tinan hirak liu ba iha nasaun balun, iha ne'ebé maioria labarik mak sai vítima no mate tanba sarampu kompara ho ema ne'ebé mate tanba vírus ébola.

Hare ba situasaun ida ne'e, porta-voz Sala Situasaun ne'e bolu atensaun populasaun Timor-Leste tomak atu labele fó deit prioridade ba luta kontra COVID-19, maibe presija fó mós importánsia ba saúde labarik sira nian, hodi garante katak labarik hotu-hotu tenki hetan protesaun husi moras ne'ebé bele prevene liuhosi imunizasaun tanba liuhosi vasina bele proteje ema husi moras oin-oin no sai mós aliserse ba ema hotu nia moris diak.

Iha fatin hanesan, Odete apresia pesoál sira ne'ebé hala'o kna'ar iha liña frente no agradese mós entidade hotu ne'ebé tau ona fiar ba Sala Situasaun Sentru Integradu Jestaun Krize hodi lidera servisu ba kombate Corona vírus iha Timor-Leste.

Categoría Noticia