Númeru kazu detetadu la aumenta. Totál ezame laboratóriu ne'ebé halo ona hamutuk 719

 

To'o oras ne'e, kazu foun sei mantén zero, kazu konfirmadu ne'ebé sei iha izolamentu Vera-Cruz hamutuk 8 no kazu rekuperadu 20, 16 husi konfirmadu no 4 provável. Enkuantu, to'o tersa-feira ne'e, teste laboratóriu ne'ebé halo ona hamutuk 719 kompara ho horseik 706.

Husi ezame laboratóriu ne'ebé halo ona, kazu negativu hamutuk 622 no ema ne'ebé kontinua hein rezultadu hamutuk 73 kompara ho horseik iha 103.

Dadus ne'e hato'o husi Porta-voz Sentru Integradu Jestaun Krize, Rui Maria de Araújo, iha konferénsia imprensa ne'ebé hala'o, iha tersa-feira ne'e.

Ema sira ne'e sei hela iha kuarentena obrigatória no autokuarentena hamutuk 253 (46 halo autokuarentena iha munisípiu sira, 169 iha fasilidade Governu nian iha Díli no 38 iha fasilidade Governu nian iha munisípiu sira seluk).

Relasiona ho Loron Mundiál Hijiene Liman nian ne'ebé selebra iha loron 5 fulan-maiu, ex-Ministru Saúde ne'e, afirma katak "tinan ida ne'e, Organizasaun Mundiál Saúde propoin nu'udar objetivu selebrasaun atu ita hotu rekoñese katak fase liman sai nu'udar asaun efetivu liu ne'ebé indivídu ida-idak bele halo hodi reduz transmisaun fini-moras nian inklui COVID-19".

Atu salva ita nia a'an no mós salva ema seluk husi moras infekto-kontajioza inklui husi moras COVID-19, porta-voz Sala Situasaun husu ba populasaun tomak atu nafatin halo esforsu hodi fase liman bei-beik ho be no sabaun, nu'udar dalan ida ne'ebé efetivu atu hadook-an husi Corona vírus.

Ba profisionál saúde sira, liu-liu ba enfermeiru, parteira no médiku sira ne'ebé diretamente atu halo kontaktu no halo tratamentu ho pasiente sira, atu fase liman molok kaer pasiente, molok halo intervensaun ruma no hafoin kaer pasiente ka hafoin halo intervensaun ruma. Tuir Rui Araújo, hahalok ida ne'e simples, dala barak ita la tau importánsia, maibe determinante tebes iha transmisaun moras infekto-kontajioza husi ema ida ba ema seluk inklui husi transmisaun moras COVID-19.

Ba populasaun tomak, liu-liu ba joven sira, Koordenadór Ofisiál ba Ligasaun Forsa Tarefa ne'e, husu atu kumpri nafatin ho disiplina regra distansiamentu sosiál koletivu, hanesan labele halibur malu ka lao rame-rame liuhosi ema nain lima, maske númeru kazu detetadu la aumenta.

Images
Categoría Noticia