La iha kazu foun ba Corona vírus, iha sexta-feira ne'e, enkuantu númeru teste aumenta ba 830

 

Númeru rekuperadu ba COVID-19 sei mantén 21 (17 husi kazu konfirmadu no 4 husi kazu provável) no la iha kazu foun, iha sexta-feira ne'e, enkuantu númeru teste aumenta tan ba 830 ho negativu 692 no hein rezultadu 114, informa porta-voz Sala Situasaun Sentru Integradu Jestaun Krize, iha konferénsia imprensa, sexta-feira ne'e.

Odete Viegas haktuir katak liu hosi atividade triajén no vijiánsia sentinela ne'ebé hala'o iha sentru saúde no ospitál referál sira iha munisípiu hotu-hotu, ekipa konjunta ba forsa tarefa halo mós teste ba ema sira ne'ebé sai ona husi kuarentena obrigatóriu no autokuarentena inklui ema sira ne'ebé iha sintoma infesaun respiratória aguda.

Liuhosi teste ne'e, ekipa rekolla ona amostra hamutuk 56 hafoin atividade triajén no vijilánsia sentinela ne'ebé hala'o iha munisípiu Covalima, Ermera, Lautem no Liquiça.

Porta-voz ne'e afirma katak durante atividade triajén no vijilánsia sentinela, iha mós komunidade balun inklui ema sira ne'ebé sai ona husi fatin kuarentena iha konsiénsia atu koopera ho parte relevante hodi halo mós teste ba sira atu nune'e bele identifika sedu karik sira iha duni moras ba COVID-19 sei lori ba hela iha fatin izolamentu.

Diretora-Jerál ba Prestasaun Servisu Saúde Ministériu Saúde realsa katak ekipa pilár dois nafatin habelar informasaun ba populasaun tomak hodi partisipa iha prosesu hirak ne'e nune'e bele kontribui ba kombate vírus ne'e iha komunidade nia leet.

Tuir dadus husi Sala Situasaun iha loron 8 fulan-maiu tinan 2020, totál ema ne'ebé sei iha kuarentena obrigatóriu hamutuk 135, iha Díli 101 no iha munisípiu sira seluk hamutuk 34. Enkuantu, ema iha autokuarentena hamutuk 32, Díli la iha no 32 iha munisípiu sira seluk.

Wainhira hatan ba Jornalista sira konaba Arsenio Bano ne'ebe iha hela autokuarentena hafoin fila husi estranjeiro, Odete Viegas rekonhese katak iha duni ema ida mak auto kuarentena iha no ema ne'e mak Arsenio Bano.

Entretantu, totál profisionál saúde ne'ebé sei hela iha kuarentena hamutuk 44.

Ema ne'ebé liu ona períodu loron sanulu resin haat iha konfinamentu obrigatóriu no autokonfinamentu hamutuk 2080. Iha Díli 1642 no 438 iha munisípiu sira seluk.

Categoría Noticia