Governu Husu ba Komunidade Atu Mantein Kalma Relasiona ho Pandemia KOVID-19

Dili, 17 Marsu 2020: Governu hakarak informa ba Públiku sira atu labele pániku relasiona ho planu Governu nian ne’ebé solisita ba S.E. Prezidente Repúblika atu dekreta Estadu Emerjensia relasiona ho pandemia Koronavírus ka KOVID 19.

Objetivu hosi Estadu Emerjensia nian ne’e mak, limita de’it movimentasaun ema nian, hodi evita sirkulasaun surtu KOVID-19, enkuantu importasaun sasán nesesidade báziku sira, no medikamentu nian kontinua la’o hanesan baibain.

Governu liuhosi Ministru Kordenadór ba Asuntu Ekonómiku, Sr. Fidélis Leite Magalhães iha segunda semana ne’e konvoka ona enkontru Jeral ida ho dirijente AIFAESA, Sentru Lojístika Nasionál (CLN-sigla Portugés) no Ajénsia Importador sira, oinsá halo preparasaun di’ak atu asegura katak nesesidade báziku kontinua sírkula normal iha merkadu sira, no vida ekonomia kontinua la’o normal.

Iha enkontru ne’e, CLN relata katak stock nasionál sei seguru hela, karik iha kazu nesesáriu tebes atu blokeiu,  mak garante ekonomia rai-laran sei la’o aguenta to’o fulan 4 oin mai.

Parte AIFAESA ho Ajénsia Importador sira sei halo kontrolu ne’ebé rigor ba armazén no loja sira atu nune’e evita importador ka loja na’in sira hasa’e folin.

Komunidade/ komprador sira ne’ebé mak ba sosa sasán iha loja sira, karik haree folin la razoável, bele hato’o keixa ba parte kompetente hanesan Polísia ou AIFAESA atu sira bele tun intervein hodi fó sansaun ba loja nain refere, tanba Governu sei la tolera importador ka loja na’in sira ne’ebé aproveita oportunidade buka lukru ba an rasik iha situasaun emerjensia nia laran.

Tuir mai personalidade sira ne’ebé ita-boot sira presiza kontakta wainhira haree sasán folin sa’e derrepente iha loja: Kordenadór AIFAESA, Abílio Sereno: 77960898; Diretor Operasionál AIFAESA, Gabriel da Costa: 77087428; Responsavel Divisão Informação Pública da AIFAESA, Francisca Fátima: 78528835. HOTU