Primeiru-Ministru Taur Matan Ruak Apela ba Populasaun Prepara-an Psikolojikamente no Moralmente Hodi Enfrenta KOVID-19

Dili, 20 Marsu 2020:  Dezde Surtu Koronavírus ka KOVID-19 ne’e akontese dahuluk iha Sidade Wuhan, Xina, iha Dezembru 2019, to’o a data, virus ne’e sai ona pandemia global hodi alastra ona ba Pais  hamutuk 186, ho total kazu; 244,979, mate; 10,035 no ne’ebé rekopera: 87,408, data 20 Marsu 2020.

Kleur ou lais  pandemia ne’e sei  atinje mós Timor-Leste, tanba país viziñu rua hanesan Indonézia no Austrália  infetadu ona, tanba ne’e Xefe Governu apela ba populasaun sira atu labele pániku maibé prepara na psikolojikamente no moralmente hodi enfrenta KOVID-19 karik virus ne’e atinje Timor-Leste.

“Dalaruma ita-boot sira ida iha ona karik ita la hatene? Tanba besik-besik hela ne’e, ita-nian sira ne’ebé balun mai hosi Koreia ba liu de’it nia uma! keta nia lori ho mai karik. Ita-boot sira haree, iha Brasil foin dadauk Prezidente Bolsonaro, nia ba ho nia delegasaun ba hasoru  Prezidente EUA Trump, filafali mai ninian  16 mak kona-dala ida i Prezidente  dala ruma kona tan, Ministru  Interior Austrália nian ba vizita hasoru  Prezidente Trump nia oan feto no White House nia funsionáriu sira, fila mai nia mós kona-korona tiha, ne’ebé dalaruma ita bele dehan iha ne’e ona, agora ita tenke prepara psikolojikamente, moralmente tenke preparadu, ita labele hanoin dehan buat ne’e malae de’it. Kuidadu!” dehan Xefe Governu hodi fó atensaun ba sidadaun sira, hafoin remata enkontru semanal ho Xefe Estadu, kinta-feira ne’e iha Palasiu Prezidente Nicolau Lobato.

Xefe Ezekutivu mós iha kinta ne’e diskute ho Xefe Estadu kona-ba previzaun ba impaktu sósiu ekonómiku rai-laran nian karik virus ne’e atinje Timor-Leste liuliu wainhira nesesita  tebes Estadu  Dekreta Estadu Emerjensia, nu’udar meius ida halo prevensaun, tanba  Pais lubuk mak obrigadu dekreta ona emerjensia nasionál(lockdown) hodi evita Pandemia ne’e transmite mais pior.

Daudaun ne’e ekipa interministerial ne’ebé lidera hosi Ministra Saúde Interina halo hela esforsu oioin kona-ba preparativu sira ba prevensaun KOVID-19 nian. Entretantu to’o a data, Timor-Leste sei livre hosi KOVID-19. HOTU