Komunikadu Imprensa
Sorumutuk Konsellu Ministrus nian iha loron 10 fulan-marsu tinan 2021
Konsellu Ministrus hala’o sorumutuk iha Ministériu Finansas, iha Dili no, aprova ona Proposta Lei ba alterasaun dahuluk ba Lei nu. 6/2016, loron 25 fulan-maiu, kona-ba Lei Resensiamentu Eleitorál, ne’ebé aprezenta husi Ministru Administrasaun Estatál, Miguel Pereira de Carvalho. Ho alterasaun ida-ne’e ema ne’ebé halakon ka estraga ninia kartaun eleitorál dala tolu ka liu nia sei sujeita ba pagamentu taxa ida ba emisaun ba kartaun foun. Atu garante seguransa boot ida iha resenseamentu eleitorál, oras ne’e mós legalmente prevee posibilidade hodi halo konfirmasaun ba dadus sira ho Ministériu Finansas, aleinde ministériu sira ne’ebé uluk prevee ona. Sertidaun batizmu no sédula pesoál komunidade izlámika nian sei aseita ba efeitu inskrisaun iha resenseamentu eleitorál no introdús elementu sira seluk iha kartaun eleitorál no iha baze dadus resenseamentu eleitorál nian. Atu garante identifikasaun eleitór ida ne’ebé loos, prevee posibilidade rekolla dadus biométriku sira hanesan dadus identifikativu eleitór sira.
Aprova mós Proposta Lei ba alterasaun datoluk ba Lei nu.5/2006, loron 28 fulan-dezembru, kona-ba Órgaun Administrasaun Eleitorál, ne’ebé mós aprezenta husi Ministru Administrasaun Estatál. Proposta Lei ne’e hakarak halo adekuasaun ba konteúdu husi diploma legál foun no ba espesifikasaun konteúdu ezistente balu, nune’e mós, atu asegura koordenasaun iha termu funsaun nian entre órgaun eleitorál rua, Komisaun Nasionál Eleisaun (CNE) no Sekretariadu Tékniku Administrasaun Eleitorál (STAE).
Hafoin aprezentasaun husi Primeiru-Ministru, Taur Matan Ruak, kona-ba situasaun epidemiolójika iha Munisípiu Kovalima, Konsellu Ministru delibera ona atu levanta impozisaun serka sanitáriu ida iha munisípiu ne’e exetu iha Postu Administrativu Fatumea, ne’ebé sei mantein to’o loron 21 fulan-marsu. Servisu sira Administrasaun Públiku nian no eskola sira sei kontinua taka to’o loron 13 fulan-marsu oinmai, tuir determinasaun husi membru Governu sira ne’ebé responsavel.
Konsellu Ministru delibera mós ona alterasaun dahuluk ba Rezolusaun Governu nian nu. 12/2021, loron 8 fulan-marsu, ne’ebé impoin serka sanitária no konfinamentu iha Munisípiu Dili, to’o oras 23:59 husi loron 15 fulan-marsu. Ho alterasaun ne-e mós bandu hala’o dezlokasaun liuhusi rai, tasi ka via aérea husi Munisípiu seluk mai Dili, exetu iha kazu hirak ne’ebé iha fundamentu forte ho razaun seguransa, saúde públika, umanitária ka seluk ne’ebé hatudu katak importante duni ba realizasaun interese públiku nian, ne’ebé hetan autorizasaun husi Ministériu Interiór. Halo mós klarifikasaun katak dezrespeitu ba orden no instrusaun sira husi autoridade kompetente sira, sei iha responsabilidade kriminál ba infratór, tuir Kódigu Penál. Durante vijénsia rezolusaun ne’e, suspende transporte koletivu sira pasajeiru nian. Ministru Koordenadór Asuntus Ekonómikus no Ministru Turizmu, Komérsiu no Industriál, liuhusi despaxu konjuntu nian, sei define atividade ekonómika no servisu saida maka tenke taka no define regra sira funsionamentu nian ba atividade sira seluk ne’ebé maka bele funsiona.
Ikusliu, Ministru Koordenadór Asuntus Ekonómikus, Joaquim Amaral, no Sekretariu Estadu Ambiente, Deométro Amaral de Carvalho, halo aprezentasaun ida iha Konsellu Ministru kona-ba Planu adaptasaun Nasionál Timor-Leste ba risku klimátika sira no ba kriasaun rezillénsi klimátika nian. Planu ne’e aprezenta medida konjuntu ida ne’ebé ninia objetivu maka atu hatán ba ameasa sira ne’ebé provoka husi alterasaun klimátika no hamenus impaktu vulnerabilidade nasionál hanesan elevasaun husi nivel tasi, inundasaun, anin boot, udan maka’as, bailoron ka akesimentu globál. Planu ne’e aprova ona husi Konsellu Ministru no agora sei submete ona ba Konvensaun-Kuadru Nasoins Unidas nian kona-ba Mudansa Klima nian. REMATA
