Sorumutuk Estraordináriu Konsellu Ministrus nian iha loron 8 fulan-marsu tinan 2021
Konsellu Ministru hala’o sorumutuk iha Ministériu Finansas, iha Dili, no hafoin análize aprezentasaun husi Sala Situasaun, iha Sentru Intergradu Jestaun Krize, kona-ba pontu situasaun husi SARS-CoV-2 iha país, Governu deside ona atu hala’o serka sanitária ka konfinamentu obrigatóriu iha Munisípiu Dili, durante loron hitu, , hahú oras 00:00 loron 9 fulan-marsu to’o oras 23:59 loron 15 fulan-marsu, ho posibilidade atu extende tan liu loron hitu.
Nune’e, bandu hala’o deslokasaun husi rai, tasi ka aérea ba Munisípiu seluk, exetu iha kazu ne’ebé fundamentu ho razaun seguransa, saúde públika, umanitária ka seluk ne’ebé revela nesesária atu hala’o ba interese públiku, ne’ebé autoriza husi Ministériu Interiór.
Impoen konfinamentu domisiliáriu jerál ba populasaun hela iha munisípiu Dili, ne’ebé prezuízu atu desloka sai husi rezidénsia bainhira justifika tuir razaun nesesidade ne’ebé bandu husi asisténsia médika própriu ka familiares ne’ebé hodi kuidadu iha partisipasaun iha dilijénsia judisiál ka polisiál sira ne’ebé notifika ona; hodi sosa sasan ka pagamentu servisu ba nesesidade dahuluk, liuliu sosa ai-han, pagamentu fornesimentu enerjia elétrika ka pagamentu servisu telekomunikasaun no asesu ba internet; no kumpri ba obrigasaun profesionál ne’ebé la dispensadu ba respetiva entidade empregadora.
Membru Governu no órgaun ezekutivu husi ema koletiva públika iha administrasaun indireta Estadu identifika funsionáriu, ajente no traballadór sira husi administrasaun públika ne’ebé tenke garante servisu esensiál sira no ne’ebé laiha dispensa ba kumprimentu husi devér komparensia iha serbisu fatin.
Ministru Koordenadór Asuntu Ekonómiku no Ministru Turizmu, Komérsiu no Industria sei aprova, tuir Despaxu konjuntu, modelu ba identifikasaun husi traballadór sira setór privadu nian ne’ebé laiha dispensa husi sira nia entidade empregadora ba devér komparénsia iha serbisu fatin.
Bandu hala’o eventu saida de’it, natureza sosiál, kulturál, desportiva no relijioza ne’ebé implika ba aglomerasaun pesoál.
Kumpri devér ne’ebé mosu anteriormente sei fiskaliza husi forsa polisiál sira.
Ikusliu, Konsellu Ministru aprova ona Planu Vasinasaun Kontra COVID-19, ne’ebé aprezenta husi Vise-Primeira-Ministra no Ministra Solidariedade Sosiál, Armanda Berta dos Santos no husi Komisaun Interministeriál ba Elaborasaun Koordenasaun Ezekusaun Planu Vasinasaun kontra COVID-19. Tuir roteiru ne’ebé aprezenta hein katak doze dahuluk 33.600 to’o Timor-Leste iha semana dahaat fulan-marsu tinan 2021 nian no lansamentu ba faze dahuluk vasinasaun sei hahú iha segunda semana fulan-abril. Prevee katak ema sira hotu ho idade 18 ba leten sei hetan vasina to’o finál tinan 2021. Vasinasaun ba menór husi tinan 18 sei hala’o iha tinan 2022, maibé ninia planifikasaun sei dependente ba rekomensadaun téknika husi Organizasaun Mundiál Saúde. Hala’o hela atividade planeamentu no preparasaun implementasaun planu vasinasaun, hanesan preparasaun kondisaun armazenamentu, ba formasaun ekipa sira REMATA
