Sorumutuk Estraordináriu Konsellu Ministrus nian iha loron 29 fulan-marsu tinan 2021

Komunikadu Imprensa
Sorumutuk Estraordináriu Konsellu Ministrus nian iha loron 29 fulan-marsu tinan 2021
Konsellu Ministru hala’o sorumutuk liuhusi vídeokonferénsia no, hafoin halo análize ba aprezentasaun husi koordenadór sira husi Sentru Integradu Jestaun Krize (CIGC) kona-ba pontu situasaun epidemiolójika nasionál, aprova ona projetu Dekretu Governu nian ba alterasaun dahuluk ba Dekretu Governu nu. 6/2021 loron 2 fulan-marsu, kona-ba Medida Ezekusaun Deklarasaun Estadu Emerjénsia ne’ebé efetua husi Dekretu Prezidente Repúblika nian nu. 15/2021, loron 1 fulan-marsu, tama iha vigór to’o tuku 23:59 iha loron 2 fulan-abril tinan 2021.
Ho alterasaun ida ne’e izolamentu terapéutiku bele hala’o iha uma, tuir despaxu fundamentadu Minista Saúde nian.
Oras ne’e iha mós posibilidade atu hala’o Izolamentu profilátiku obrigatória (kuarantena) iha uma, maibé despeza hirak ne’ebé relasionada ho izolamentu profilátiku tulun husi individu ida-idak bainhira kumpre ona iha estabelesimentu saúde, rezidénsia ka iha sentru izolamentu privadu sira.
Projetu Dekretu Governu ne’e define mós katak sidadaun hotu-hotu hela iha Timor-Leste iha obrigasaun atu evita formasaun halibur-malu, iha dalan públiku. Ba efeitu Dekretu Governu ne’e, konsidera katak halibur malu ema barak iha grupu ne’ebé liu ema na’in rua ne’ebé menus husi metru rua entre sira.
Konsellu Ministru aprova mós projetu Rezolusaun Governu nian ba renovasaun impozisaun serka sanitária no konfinamentu domisiliáriu jerál ba populasaun iha munisípiu Baukau no Vikeke to’o tuku 23:59 loron 2 fulan-abril tinan 2021.
Mantein nafatin regra sira hotu ne’ebé antes ne’e defini ona iha Rezolusaun Governu nu. 17/2021, 18/2021, 19/2021 no 20/2021 loron 15 fulan-marsu, ne’ebé impoin serka sanitária no konfinamentu domisiliáriu iha munisípiu Baukau no Vikeke.
Nune’e, kontinua bandu sirkulasaun ema nian entre munisípiu rua ne’e ho sirkunskrisaun administrativa sira-seluk, exetu iha kazu sira ho fundamentu forte tanba razaun seguransa públika, saúde públika, asisténsia umanitária, manutensaun husi sistema abastesimentu públiku ka ba realizasaun interese públiku nian.
Permanese nafatin mós impozisaun no konfinamentu domisiliáriu ba ema hotu ne’ebé hela no daudaun ne’e iha munisípiu Baukau no Vikeke, exetu ba razaun ne’ebé maka antes ne’e defini ona, liuliu ba razaun saúde, servisu, no ba asesu ba sasan no servisu primeira nesesidade nian. REMATA
Share via
Copy link
Powered by Social Snap
COVID-19 Timor-Leste

FREE
VIEW