05 Marsu 2021: Ministra Saúde (MS) dr. Odete Maria Freitas Belo,MPH ho Vise-Ministru Saúde (VMS) Sr. Bonifácio Mau Coli dos Reis, Lic.SP. Simu Vasina Covid-19 hosi Representante UNICEF iha Timor-Leste Sr. Bilal Aurang Zen Durrani akompana Husi Reprezentante Organizasaun Mundiál Saúde iha Timor-Leste Dr. Arvind Mathut, iha Aeroportu internasional, Nikolau Lobato, Komoro, Díli.
MS iha biban ne’e hatete “uluk nanain ha’u lori Primeiru Ministru (PM) nia naran hato’o ba ita-boot sira katak PM labele marka prezensa iha ne’e tanba iha atividade ida importante liga ho situasaun inundasaun horiseik nian.
Ha’u atu hakarak hatete la’ós fasil ita hotu-hotu servisu hamutuk lori vasina ida-ne’e to’o iha Ita-nia rain, liuhusi atividade lubuk ida, enkontru lubuk ida partisípasaun ita-nia ajénsia sira, ita-nia duadór sira, embaixadór sira, la’ós ita mesak serbisu maibé ita luta hamutuk atu lori mai.
“Iha parte ida ita luta hasoru Covid-19, ha’u hatene katak ita susesu ita susesu tebtebes ho ita-boot sira-nia serbisu, ita-boot sira hatudu katak Timor-Leste ita susesu iha prevensaun atu hamate ita-nia Povu ou lori ita-nia povu ba moras todan Covid-19 nian.”
“Iha parte seluk ha’u-mós hakarak atu dehan bainhira ita luta kontra Covid-19 iha tempu hanesan ita-mós aranja no hakarak atu lori vasina mai iha ita-nia rai no ida-ne’e akontese duni, ohin ita simu hamutuk no ita halo termu de entrega ida ba vasina Covid-19 nian husi ita-nia ajénsia OMS nomós Unicef ne’ebé entrega ba Ministériu Saúde (MdS) la signifika katak sira nain rua mesak mak halo esforsu ida-ne’e maibé tu’ur hamutuk ho ita-nia parseiru duadór sira hotu hodi halo vasina ne’e bele to’o iha ita-nia rai.”
Ita mós sei infrenta nafatin problema ida seluk mak halo nu’usa ita bele konvense ita-nia komunidade muda ita-nia komunidade nia atetude sira atu bele simu vasina no ha’u hakarak atu hatete iha ne’e katak PM ohin la marka prezensa iha ne’e maibé ohin iha konsellu interministérial ba dezastre natureza nian informa katak PM Mak sai hanesan primeiru homen ou ema dahuluk ne’ebé mak atu simu vasina iha Timor-Leste.
Atu hatudu katak vasina ida-ne’e seguru, vasina ida-ne’e kualidade nomós vasina ida-ne’e nia efikasia ne’e di’ak, i ita hili vasina ida-ne’e mak di’ak ba iha ita-nia rai no ita la hili buat ne’ebé mak aat ba ita-nia rai.”
Partisípa iha serimonia mak Ministra Negósiu Estranjeiru no Kooperasaun Sra. Adaljiza Magno, Ekipa OMS/WHO-TL, Ekipa Unicef, ekipa Gabi, korpu diplomátiku sira, NITAG, Ekipa husi Ministériu Transporte no Komunikasaun Sosiál, Diretór Jerál no Ezekutivu sira Husi MdS, no seluk-seluk tan.
