DILI, 09 marsu 2021 (TATOLI)—Adjuntu Prezidente Autoridade Munisípiu Dili, António Moniz Calau informa, ohin, ekipa saneamentu sei hala’o knaar hodi rekolla lixu iha Kapitál Dili maibé kamioneta ne’ebé tula lixu ne’e labele halo movimentu hodi fakar lixu iha Lixeira Tibar tanba seguransa bolkeia pontu entrada Tasi Tolu no seguransa iha Liquiça halo intervensaun.
“Ohin, ita-nia ekipa pesoál rekolla lixu ho kamioneta ba fakar lixu iha Lixeira Tibar nian, bainhira kamioneta fila-fali mai Dili, seguransa hosi Liquiça nian hateten agora ne’e labele fakar ona iha Lixeira Tibar. Agora la’ós de’it ema mak labele sai hosi Dili maibé lixu mós labele sai hosi Dili. Agora, ita hein orden tuir mai hosi Ministériu Administrasaun Estatál,” António Moniz Calau hateten ba Agência TATOLI liuhosi telefónika, tersa ne’e.
Nia hatutan, kamioneta hirak ne’e para ona tanba lockdown ka serka sanitaria maibé parte Administrasaun Munisípiu DILI (AMD) mós sei rona orden hosi ministériu ne’ebé AMD tutela ba mak Ministériu Administrasaun Estatál.
Adjuntu ne’e hateten, ekipa saneamentu sei hein orden hosi Ministériu Administrasaun Estatál (MAE) no ohin ekipa Administrasaun Munisípiu Dili (AMD) halo ona enkontru ho Ministériu Administrasaun Estatál (MAE) atu solusiona servisu pesoál saneamentu sira iha Munisípiu Dili nian.
“Kona-ba servisu saneamentu inklui ho servisu jestaun merkadória iha Munisípiu Dili, ita sei halo koordenasaun ho parte relevante sira oinsá foti medida ba asuntu ne’e, tanba ita-nia Konsellu Ministru fó sai ona katak Munisípiu Dili durante semana ida halo serka sanitaria,” nia hateten.
Maibé Calau haktuir, ekipa hirak ne’e ohin sei halo servisu hanesan baibain maske iha despaisu ba serka sanitária implementa ona iha horisehik iha 00h00 iha kapitál Dili.
“Serka sanitária implementa meia noite (00:00), maibé desizaun ba ita-nia ekipa saneamentu sira ne’ebé rekolla lixu, ami seidauk bele deside tanba agora sei halo koordenasaun ho ministériu relavante atu deside katak ekipa ne’e kontinua ka sira mós tenke kumpre regra serka sanitária ne’e,” nia haktuir.
Maibé, tuir observasaun hosi Agência TATOLI, bainhira Polísia Nasionál Timor-Leste (PNTL) bolkeia entrada Tasi Tolu, Dili, kamioneta sira-ne’ebé tula lixu atu ba fakar iha Lixeira Tibar, membru seguransa sira haruka ekipa saneamentu ne’ebé rekolla lixu iha kamioneta laran ne’e, tuun hela iha Tasi Tolu.
Membru PNTL sira, fó de’it autorizasaun hodi husik motorista kamioneta sira mesak mak lori lixu ba fakar iha Lixeira Tibar, hafoin kamioneta sira-ne’e fila-fali mai mak tula ho ekipa sira-ne’e hodi rekolla lixu iha Dili.
Jornalista: Osória Marques
Editór: Cancio Ximenes
