DILI, 08 marsu 2021 (TATOLI)—Reuniaun Konsellu Ministru (KM) aprova ona Planu Vasinasaun Kontra COVID-19 iha Timor-Leste, ne’ebé aprezenta hosi Vise-Primeiru-Ministru no Ministra Solidariedade Sosiál no Inkluzaun, Armanda Berta dos Santos no Komisaun Interministeriál ba Elaborasaun Koordenasaun ezekusaun planu.
“Tuir roteiru ne’ebé aprezenta, hein katak faze dahuluk unidade 33.600 bele to’o Timor-Leste iha semana dahaat marsu 2021, enkuantu lansamentu ba faze dahuluk vasinasaun sei hahú iha semana daruak abríl,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Ministériu Finansa (MF), Aitarak-laran, segunda ne’e.
Daudaun ekipa halo hela atividade planeamentu no preparasaun ba implementasaun planu vasinasaun ba kondisaun armazenamentu no formasaun ekipa sira.
“Prevee katak ema sira ho idade 18 ba leten sei hetan vasina to’o finál tinan 2021. Vasinasaun ba menór tinan 18 sei halo iha tinan 2022, maibé ninia planu sei depende ba rekomensadaun téknika hosi Organizasaun Mundiál Saúde (OMS),” Portavós Governu informa.
Antes ne’e, ezekutivu sira aprova ona planu vasinasaun ho tipu AstraZeneca, tanba tuir rekomendasaun OMS katak vasina ne’e seguru no efikáz, no mós haree ba kondisaun nesesáriu hanesan armazenamentu no refrijerasaun, entre grau rua sentígradu no grau sentígradu ualu no hanesan similar ba utiliza iha programa vasinasaun nasionál sira seluk.
Jornalista: Antónia Gusmão
Editora: Julia Chatarina
