DILI, 04 janeiru 2021 (TATOLI)— Koordenadora Jerál COVID-19 husi Ministériu Saúde, Odete Viegas da Silva, hateten Timor-Leste sei uza AstraZeneca hodi vasina komunidade ne’ebé identifikadu risku ba transmisaun COVID-19, nune’e bele halo prevensaun.
“Esforsu Governu no Estadu halo atu bele mós aplika rekomendasaun husi Organizasaun Mundial Saúde (OMS) fó iha vasina oin tolu iha vasina ida mak apropria ho ita-nia situasaun iha Timor-Leste mak sei iha komisaun nasionál vasina prepara prosedimentu hotu molok implementa no Ministériu saúde husi pilár sira sei hato’o informasaun ba komidade tomak molok ita hetan vasinasaun,” Odete hateten ba jornalista sira iha konferénsia imprensa iha Caicoli Dili, ohin.
Notísia Relevante :MS detekta tan pasiente COVID-19 na’in tolu, neen rekuperadu
University of Oxford maka dezenvolve vasina oin tolu ne’e, maibé TL hili AstraZeneca ne’ebé maka Ministériu Saúde hetan apoiu husi parseiru sira hanesan GAVI, CEPI, WHO no UNICEF.
Nia hateten programa vasinasaun ne’e sei proteze komunidade husi COVID-19.
Iha okaziaun ne’e nia mós apela ba komunidade atu tau nafatin konfiansa ba peso’al saúde sira hodi prevene pandemia globál COVID-19 iha rai-laran.
‘Ami husu ba públiku no entidade hotu, relasiona ho númeru kazu pozitivu ne’ebé kontinua rejista iha ita nia rain, husu atu tau koopera, kolabora no nafatin tau fiar mai ami Ministériu Saúde hodi bele hala’o ami-nia kna’ar tuir padraun, labele pániku, kumpri nafatin regras Estadu emerjénsia ne’ebé mak Governu dekreta ona no medida preventiva tuir protokolu Ministériu Saúde no Organizasaun Mundiál Saúde fó sai ona,’’ nia hateten.
Notísia Relevante :MS detekta tan Timoroan na’in rua ho COVID-19 pozitivu
Jornalista: Felicidade Ximenes
Editór: Agapito dos Santos
