DILI, 21 setembru 2020 (TATOLI) – Ekipa koordenasaun jerál COVID-19 husi pilar ida to’o sia
rekomenda ba Governu atu evita ema tama Timor-Leste liuhosi fronteira terrestre, aeroportu no portu
hodi prevene transmisaun surtu COVID-19.
”Koordenadora Jerál hamutuk parseiru no mós kordenadór pilar ida to’o sia fó rekomendasaun balun
ba Governu liliu ba iha Ministériu relevante atu foti medida ida ba oin atu bele evita lai ema sira
ne’ebé mak tama mai iha iha rai laran,” dehan Koordenadora Jerál COVID-19, Ministériu Saúde,
Odete da Silva Viegas, ba jornalista sira iha Palasiu Sinzas Caicoli, segunda ne’e.
Razaun husi sira-nia rekomendasaun ne’e maka tanba ekipa laiha rekursu umanu atu halo
mobilizasaun ba ema ne’ebe tama Timor-Leste hodi halo prevensaun.
“Ema ne’ebé mak tama ilegál (fronteira-red) ne’e sei fó risku ba iha transmisaun ba iha komunidade
nia leet ,” katak nia.
Nia hatutan ekipa mós rekomenda ba Governu atu fó sansaun forte ba sidadaun Timor-Leste no
Indonézia ne’ebé hakat fronteira terrestre ho dalan ilegál.
“Tenki fó sansaun ba sira tanba sira tama sai tuir regra depois ita fó tan fasilidade ba sira depois sira
kontinua tama ilegál nafatin,” dehan Odete.
