DILI, 11 janeiru 2021 (TATOLI)—Ekipa COVID-19 husi Ministériu Saúde (MS), iha findesemana liubá, fó alta ona pasiente COVID-19 hamutuk na’in haat ne’ebé maka durante ne’e izola iha sala izolamentu Sentru Saúde Vera Cruz no Rejiaun Administrativa Espesiál Oe-Cusse Ambeno (RAEOA) tanba rekupera ona husi moras coronavirus.
Koordenadór COVID-19, Ministériu Saúde, Nilton da Silva, informa ekipa MS liuhosi pilar 7 entrega ona pasiente na’in haat ne’e ba sira-nia família hafoin teste laboratóriu justifika sira livre ona husi COVID-19.
“Liuhosi biban ne’e hakarak informa ba públiku katak Ministériu Saúde fó alta ona pasiente rekuperadu na’in ida husi sala izolamentu Vera-Cruz no na’in tolu husi RAEOA ne’ebé ita izola no sira fila ona ba sira-nia família iha loron rua liubá,” Nilton da Silva, informa liuhosi nota imprensa ne’ebé maka Tatoli, asesu segunda ne’e.
Tuir dadus komulativu to’o loron 11 fulan-janeiru 2021 ohin hamutuk 17.668, rezultadu negativu 17.394, hein rezultadu 225, kazu baixa hamutuk na’in ualu, rekuperadu+provavél 45, kazu konfirmadu 49, kazu foun 0 no mate 0.
Entretantu, iha loron 04 fulan-janeiru 2021, Ekipa COVID-19 Ministériu Saúde, fó livre pasiente konfirmadu na’in 6 kompostu husi feto na’in rua no mane 4 husi sala izolamentu Vera-Cruz tanba rekuperadu husi moras coronavirus.
Jornalista :Felicidade Ximenes
Editór :Agapito dos Santos
