Dili, loron 31 fulan-marsu tinan 2021 – Parlamentu Nasionál iha plenária estraordinária kuarta ne’e, aprova ona pedidu Xefe Estadu nian ba deklarasaun renovasaun Estadu Emerjénsia ba dala-12° ba teritóriu tomak, ho votu nominal a favor 49 kontra 0 no abstensaun 14.
Ho aprovasaun ne’e, Xefe Estadu sei deklara estensaun Estadu Emerjénsia fulan ida tan hahú hosi loron 3 fulan-abril to’o loron 2 fulan-maiu tinan 2021, atu fó kbiit ba Governu atu halo prevensaun no mitigasaun ba propagasaun surtu vírus SARS-COV2, ne’ebé daudaun ne’e tama ona iha tranzmisaun lokál.
Atualizasaun kazu COVID-19 :
Tuir dadus hosi Sala Situasaun, to’o loron 30 fulan-marsu ne’e, daudaun ne’e Timor-Leste rezista ona kazu pozitivu COVID-19 kumulativu hamutuk 563, kazu ativu hela 382, rekuperadu 181, enkuantu seidauk rezista kazu óbitu. Entretantu iha nivel mundial nian, tuir dadus hosi https://www.worldometers.info/coronavirus), ba loron 31 fulan-marsu tinan 2021, kazu pozitivu atinje ona millaun 128,788,958, mate millaun 2,815,035 no ne’ebé rekuperadu millaun 103,916,332 HOTU/MGPM
