DILI, 08 marsu 2021 (TATOLI)—Ministériu Ensinu Superiór Siénsia no Kultura (MESSK) hasai ona sikulár, hodi suspende provizóriu atividade letiva ba Instituisaun Ensinu Superiór Públiku no Privadu (IESPP) iha kapitál Dili.
MESSK fó-sai sirkulár ne’e ho númeru 01/MESSK/Ministru/III/2021, tanba iha ona kazu foun COVID-19, iha Munisípiu Dili.
Ministru Longuinhos dos Santos hateten, determinasaun hodi suspende imediata atividade iha IESPP ne’e tanba hakru’uk ba desizaun Governu nian, ne’ebé deside sanitária no konfinamentu obrigatóriu iha Munisípiu Dili.
“Husu ba IESPP sira hotu-hotu katak, laiha esesaun sujeitu ba asaun fiskalizasaun destinadu no husu atu kumpre órden ne’ebé hatuur ona iha sirkulár ne’e,” Agência Tatoli sita konteúdu sirkulár, ne’ebé asesu iha segunda ne’e.
Entretantu, serka sanitária no konfinamentu obrigatóriu iha Munisípiu Dili sei hahú iha oras 00:00 loron 9 fulan marsu, to’o oras 23:59 loron 15 fulan marsu 2021, ne’ebé prevista iha númeru 2 artigu 17 hosi dekretu Governu númeru 6/2021 loron 2 fulan marsu.
Jornalista: Tomé Amado
Editór: Cipriano Colo
