DILI, 04 janeiru 2021 (TATOLI)—Ministeriu Edukasaun Juventude no Desportu (MEJD) sei diskute regra prevensaun COVID-19 ho Ministériu Saúde (MS) hodi implementa iha eskola sira iha territóriu Timor-Leste.
“Ita sei diskute ho MS kona-ba implementasaun regra prevensaun COVID-19 iha eskola sira tanba ita mós follow up filafali fasilidade COVID-19 nian ne’ebé mak ita forñese ona ba eskola sira iha fulan haat liuba hanesan bee moos, tanki, balde no dezifekstante para sasán sira ne’e bele utiliza tuir duni nesesidade no kondisaun ne’ebé iha,” Ministru Armindo Maia, ba jornalista sira iha konferénsia imprensa, iha Caicoli Dili, segunda ne’e.
Nia dehan regra prevensaun hirak ne’e importante para kombate transmisaun lokál pandemia globál COVID-19 bainhira re-ativa prosesu aprendijazen ba estudante sira iha tinan letivu 2021.
Antes ne’e, Ministériu Edukasaun Juventude no Desportu ho parseiru dezenvolvimentu sira distribui ona apoiu materiál prevensaun COVID-19 hanesan tanki bee moos, balde, máskara, dezinfektante no seluk tan ba eskola sira iha territóriu maibé balun aat ona.
http://www.tatoli.tl/2021/01/04/mejd-ho-ms-sei-diskute-regra-prevensaun-covid-19-iha-eskola/
Jornalista : Tomé Amado
Editór:Agapito dos Santos
