===KONFERÉNSIA IMPRENSA===
8 MARSU 2021, 19:30
Dr. Rui Maria de Araújo
Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, CIGC-SS)
Ohin, loron 8 fulan Marsu – Loron Internasionál Feto nian- 2021, hodi Sala Situação-Sentru Integradu Jestaun Krizi (SS-CIGC) nia naran, hakarak hato’o ba jornalista, no ba públiku tomak, informasaun hanesan tuirmai:
✅PROGRESU HUSI KAZU NE’EBÉ DETETA IHA BTN II, TASI TOLU, SUKU MADOHI, POSTU ADMINISTRATIVU DOM ALEIXO
Hafoin deteta kazu foun rua iha bairru BTN II, Tasi Tolu, Suku Madohi, Postu Administrativu Dom Aleixo, ekipa konjunta saúde buka-tuir kontaktu-besik husi kazu rua ne’e. Husi ezersisiu ida ne’e, ohin ita deteta tan kazu 6 husi kontaktu-besik, ba kazu ida. Iha sorin seluk, husi mós ezersisu rastreiu aleatóriu ne’ebé halo ba grupu de risku balun, deteta mós kazu ida tan iha Bebonuk. Ohin, ekipa konjunta saúde buka tuir mós kontaktu-besik iha área Bebonuk, no rekolle hamutuk amostra 55. Hamutuk hotu, ohin loron rekolle amostra atus-tolu (300) resin. Ita hein rezultadu iha loron hirak tuir mai.
✅PROGRESU HUSI ATIVIDADE BUKA-TUIR KONTAKTU BESIK HUSI ‘’CLUSTER’’ KLAUHALEK NO ‘’CLUSTER’’ ONU-LARAN, IHA MUNISIPIU COVALIMA.
Atividade buka-tuir kontaktu iha Fatumea, nafatin la’o iha loron hirak liu-bá. To’o ohin seidaauk iha tan rezultadu pozitivu. Ekipa konjunta saúde sei nafatin halo teste daruak ba kontaktu-besik sira hotu, iha Fatumea, Tilomar, ho Suai Vila.
✅DADUS JERAL:
1️⃣Kazu foun: 7.
2️⃣Kazu rekuperadu: 0.
3️⃣Kazu ativu: 35
✅APELU
1️⃣Husu ba populasaun iha Dili laran tomak, atu nafatin kalma, lalika pániku, halo tuir regra konfinamentu domisiliáriu jeral, ba populasaun rezidente iha Munisipiu Dili, ne’ebé sei 2 hahú orsida madrugada, zero oras, tuir buat ne’ebé porta-voz Konsellu Ministrus nian anunsia tiha ona ohin.
2️⃣Nafatin apela ba populasaun iha Covalima, atu kalma. Ekipa konjunta saúde sei presiza loron balun tan atu foti amostra no halo teste, molok foti desizaun ruma kona ba Serka Sanitária iha Covalima
3️⃣Apela mós ba populasaun Timor-Leste tomak, liu-liu iha munisipiu sanulu seluk ho RAEOA tu’ur hakmatek iha fatin, atu nafatin matan-moris neon nain, pratíka nafatin medida sira ne’ebé ita hotu hatene ona:
a) Uza maskara
b) Fase liman bebeik ho sabaun ka dezinfetante ruma
c) Wainhira kumprimenta malu, lapresiza kaer-liman, bensa-liman, rei-malu ka haku’ak malu
d) Evita halibur malu barak
e) Hamri’ik ka tur dook husi ema seluk, mínimu metru ida ho balun
#MédiaPaláciodasCinzas
