===KONFERÉNSIA IMPRENSA===

28 MARSU 2021, 16H30

Dr. Rui Maria de Araújo
Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS)
Ohin, loron 28 marsu 2021, hodi Centro Integrado Gestão de Crises-Sala Situação (CIGC-SS) nia naran, hakarak hato’o ba jornalista no ba públiku tomak, informasaun hanesan tuirmai:

I. EVOLUSAUN SURTU COVID-19 IHA MUNISIPIU DILI
Ohin, iha Munisipiu Dili iha kazu foun 11. Nune’e, kazu detetadu ka pozitivu iha Munisipiu Dili husi dia 7 de Marsu 2021, to’o ohin, 28 de Marsu de 2021, hamutuk hotu 329
Ohin kompleta semana tolu, hahú deteta kazu pozitivu iha BTN II, Aldeia Terrasanta, Suku Madohi, no mós kazu iha Aldeia 20 de Setembru, Suku Bebonuk.

To’o ohin, iha cluster 54 iha Munisipiu Dili, maibé ho baze da evolusaun propagasaun virus iha cluster sira ne’e, durante semana rua ikus, sura husi dia 14 de Marsu de 2021, ekipa konjunta saúde deside atu deklara katak iha cluster 11 (20%), maka la ativu ona iha transmisaun virus, tamba iha semana 2 nia laran ona la iha kazu foun, no sira ne’ebé kontaktu-besik ho kazu pozitivu iha cluster hirak ne’e, sira nia rezultadu teste PCR negativu dala rua. Ho nune’e, iha Munisipiu Dili, sei iha cluster 43 maka sei nafatin hatudu atividade hada’ettutan virus SARS-CoV-2 husi ema ida ba ema seluk.

✅DADUS JERAL
1️⃣Kazu foun ohin: 11
2️⃣Kazu rekuperadu: 13
3️⃣Total kazu ativu: 322
➡️Husi kazu foun nain 11 ohin, iha mane nain 7, feto nain 4
➡️Hotu-hotu asintomátiku
4️⃣Husi horiseik mai ohin hamutuk hotu LNS halo 497 testes PCR, inklui ona iha laran 196 ne’ebé mai husi pedidu autorizasaun esepsionál atu sai husi serka sanitária iha Munisipiu Dili
5️⃣Total pedidu autorizasaun esepsionál atu sai husi & tama mai serka sanitaria iha Munisipiu Dili, horiseik dia 27 de Marsu, hamutuk hotu 110. Sekretariadu CIGC responde hotu kedas, maibé 33 pedidus la prienxe kriteriu tuir Resolusaun Governu.

✅TABELA EVOLUSAUN SURTU COVID 19 IHA TIMOR-LESTE HAHÚ 22 FEVEREIRU 2021 (Tuir klasifikasaun transmissaun OMS nian)
↗️Munisipiu Dili Totál Komulativu Kazu: 329, Kazu Foun iha oras 24 ikus: 11, Klasifikasaun Transmisaun: KAZU IHA CLUSTER
↗️Munisipiu Baucau Totál Komulativu Kazu: 26, Kazu Foun iha oras 24 ikus: 0, Klasifikasaun Transmisaun: KAZU IHA CLUSTER
↗️Munispiu Covalima Totál Komulativu Kazu: 19, Kazu Foun iha oras 24 ikus: 0, Klasifikasaun Transmisaun: KAZU IHA CLUSTER
↗️Munisipiu Viqueque Totál Komulativu Kazu: 10, Kazu Foun iha oras 24 ikus: 0, Klasifikasaun Transmisaun: KAZU IHA CLUSTER
↗️Munisipiu Lautem Totál Komulativu Kazu: 1, Kazu Foun iha oras 24 ikus: 0, Klasifikasaun Transmisaun: KAZU ESPORÁDIKU
↗️RAEOA Totál Komulativu Kazu: 1, Kazu Foun iha oras 24 ikus: 0, Klasifikasaun Transmisaun: KAZU ESPORÁDIKU
↗️Munisipiu sira seluk Totál Komulativu Kazu: 0, Kazu Foun iha oras 24 ikus: , Klasifikasaun Transmisaun: LAIHA KAZU

✅ESPLIKASAUN ADISIONÁL
1️⃣Hodi CIGC-SS, ho mós ema hotu ne’ebé servisu iha liña de frente, hakarak agradese ema hotu ne’ebé detetadu pozitivu, hafoin kolabora di’ak-tebes ho ekipa konjunta saúde, aseita ba izolamentu iha fatin ne’ebé Estadu determina, atu hase’es-an husi ema ne’ebé seiduak hetan da’et virus ne’e, hodi nune’e ita hotu bele prevene, virus ne’e la da’etbelar liu-tan iha cluster sira ne’ebé durante semana rua ikus ne’e la ativu ona. Ba sira ne’ebé rekuperadu ona, parabéns ba imi nia sakrifisiu. Aproveita apela ba komunidade iha fatin ne’ebé maluk sira rekuperadu sira hela bá, favor labele tauk, tamba sira ne’ebé sai husi fatin izolamentu, ekipa saúde sira sertifika ona katak sira la iha ona risku atu hada’et-tutan virus ba ema seluk.

2️⃣Hakarak mós informa ba públiku katak sei nafatin iha ema ne’ebé, para além de la fiar, lakohi fiar, katak sira nia rezultadu PCR pozitivu, insisti atu instituisaun Estadu nian halo tuir sira nia hakarak, no lakohi kolabora ho autoridade sira atu ba iha fatin izolamentu ne’ebé Estadu determina.
Ita respeita ema ida-idak nia direitu atu lakohi rekoñese katak nia iha problema, maibé sidadaun sira hotu mós iha dever atu proteje ema seluk nia saúde, no iha obrigasaun atu kolabora ho Estadu, wainhira mosu situasaun risku ba ema barak nia saúde, no mós obrigasaun atu respeita sakrifisiu ne’ebé ema atus-ba-atus halo atu bele prevene no mitiga surtu Covid-19 ida ne’e, hodi labele afeta ba ema barak liu tan.
#MédiaPaláciodasCinzas

Share via
Copy link
Powered by Social Snap
COVID-19 Timor-Leste

FREE
VIEW