===KONFERÉNSIA IMPRENSA=== 2 marsu 2021

===KONFERÉNSIA IMPRENSA===
2 marsu 2021 15:00
Dr. Rui Maria de Araújo
Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS)
Ohin, loron 2 fulan marsu 2021, hodi Sentru Integradu Jestaun Krizi-Sala Situasaun (CIGC-SS) nia naran hakarak hato’o ba jornalista no ba públiku tomak, informasaun hanesan tuirmai:
✅PROGRESU HUSI ATIVIDADE BUKA TUIR KONTAKTU BESIK HUSI ‘’CLUSTER’’ KLAUHALEK NO ‘’CLUSTER’’ ONU-LARAN, IHA MUNISÍPIU COVALIMA.
Husi loron 22 fevereiru 2021, hafoin deteta kazu pozitivu husi amostra rastreiu seletivu em massa iha fatumea, to’o horiseik 1 marsu 2021, ekipa konjunta saúde nian, husi atividade buka tuir kontaktu-besik husi sira ne’ebé pozitivu, ho totál 278 ba ema hirak ne’ebé iha istória kontaktu-besik ho kazu konfirmadu sira. Amostra 278 ne’e foti iha Aldeia Klauhalek no aldeia Belulik Kraik iha Suku Belulik Leten, Fatumea, aldeia Onu laran, Suku Maudemu, Tilomar nomós Suai vila.
Husi amostra 278 ne’e, na’in 8 deit maka pozitivu hamutuk ho na’in 2 pozitivu husi rastreiu. Total pozitivu ka kazu konfirmadu na’in 10 ne’ebé ita hotu hatene ona.
Ohin, atividade buka tuir kontaktu-besik iha Tilomar sei la’o nafatin. Ekipa konjunta saúde iha Munisípiu Covalima ohin halo mós rastreiu iha Postu Administrativu Maucatar ho Postu Administrativu Zumalai.
✅REZULTADU RASTREIU SELETIVU EM MASSA IHA MUNISÍPIU COVALIMA, BOBONARO HO RAEOA
Aproveita mós oportunidade atu informa ba públiku katak atividade rastreiu seletivu em massa, ne’ebé hala’o husi 16 Fevereiru to’o 25 Fevereiru ninia rezultadu maka hanesan tuirmai ne’e:
Munisipiu Covalima total amostra neébé rekolla hamutuk 1372. Rua maka pozitivu (hanesan temi ona iha leten) no restu negativu hotu, inklui amostra 58 husi Postu Fohorem no 365 husi Postu Fatululik.
Munisipiu Bobonaro total amostra neébé rekolla hamutuk 1298. La iha ida mak pozitivu.
RAEOA total amostra neébé rekolla hamutuk 1078. La iha ida mak pozitivu.
Atividade rastreiu seletivu em massa sei nafatin hala’o iha Munisipiu Covalima no Bobonaro.
✅REZULTADU VIJILÁNSIA SENTINELA IHA TIMOR-LESTE NIA LARAN TOMAK
Iha fevereiru 2021 nia laran, fasilidade saúde sira hanesan Sentru Saúde ho Óspital Referénsia sira iha Timor-Leste laran tomak, rekolle amostra hamtuk hotu 1066 husi ema ne’ebé vizita. Ida ne’ebé iha sintomas infesaun respiratória aguda, no mai konsulta ka baixa iha fasilidade sira ne’e rezultadu ne’ebé iha, hatudu katak la iha ida mak pozitivu covid-19.
Husi atividade buka tuir kontaktu-besik ba kazu konfirmadu sira, husi atividade rastreiu seletivu em massa iha Munisípiu Covalima, Bobonaro no RAEOA, no husi mós atividade vijilánsia sentinela ne’ebé hala’o iha Timor-Leste nia laran tomak ita bele to’o iha konkluzaun katak husi 22 fevereiru to’o 26 fevereiru 2021, ita deteta iha Munisípiu Covalima, transmisaun lokál husi kazu primáriu ida, ne’ebé hada’et tutan ba totál kazu sekundáriu na’in 7. Husi kazu sekundáriu nain 7 ne’e, ida maka hadaet tutan ba na’in 2 seluk.
Husi 27 fevereiru mai to’o ohin, 2 marsu sei dauk deteta tan kazu foun iha Munisipiu Covalima.
Iha RAEOA no Munisípiu 12 seluk, inklui Bobonaro ne’ebé sai mós objetu ba Serka Sanitária, no Munisípiu Dili ne’ebé iha populasaun barak-liu iha Timor-Leste nia laran tomak, SEI DAUK IHA EVIDÉNSIA KONA-BA TRANSMISAUN LOKÁL.
✅DADUS JERAL:
1️⃣Kazu foun : 0
2️⃣Kazu ativu: 23.
3️⃣Ema tama husi fronteira terrestre husi 1 fevereiru to’o 28 fevereiru
(a) liu dalan regular hamutuk 39
(b) liu dalan iregular ne’ebé autoridade sira deteta hamutuk na’in 51. Sira hotu tama iha kuarentena.
✅APELU
Apela ba populasaun iha Covalima nia laran tomak, atu favor nafatin tu’ur hakmatek iha idak-idak nia fatin. Maski loron tolu nia laran ona laiha kazu foun, di’akliu lalika la’o bá-mai lai, fó tempu atu ekipa saúde, Munisípiu Covalima, buka tuir kontaktu-besik sira hotu, no foti tan amostra ba rastreiu seletivu em massa, hodi bele halo teste.
Apela espesialmente ba Timoroan hotu iha Postu Administrativu Tilomar, Fatumea, Fatululik, nomós iha Munisípiu Bobonaro no RAEOA, ne’ebé halo to’os, ka haki’ak karauk iha kedas liña fronteira, favór lalika hakat bá-mai família ka belun sira iha Indonézia, tamba oras ne’e dadaun moras Covid-19 da’et maka’as hela iha komunidade nia leet, iha Kabupaten sira ne’ebé viziñu ho Timor-Leste.
Wainhira ita hetan da’et moras ne’e husi ema ruma iha sorin-balu nebá, ita sei hada’et tutan moras ne’e mai ita-nia família, mai ema iha ita-nia aldeia, suku, Postu Administrativu, Munisipíu, no bele mós ba Timor-Leste laran tomak, hanesan foin dadaun akontese iha aldeia Klauhalek, Suku Belulik leten, Fatumea.
#MédiaPaláciodasCinzas

Share via
Copy link
Powered by Social Snap
COVID-19 Timor-Leste

FREE
VIEW