===KONFERÉNSIA IMPRENSA=== 13 MARSU 2021

===KONFERÉNSIA IMPRENSA===
13 MARSU 2021, 16H00
Dr. Rui Maria de Araújo
Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS)
Ohin, loron 13 marsu 2021, hodi Centro Integrado Gestão de Crises-Sala Situação (CIGC-SS) nia naran, hakarak hato’o ba jornalista no ba públiku tomak, informasaun hanesan tuirmai:
✅PROGRESU ATIVIDADE PREVENSAUN & MITIGASAUN SURTU COVID-19 IHA MUNISIPIU DILI
Husi horiseik mai ohin, husi amostra ne’ebé rekolla iha Munisipiu Dili, durante atividade buka-tuir kontaktu-besik, iha tan kazu positivu nain 6, ho detalles hanesan tuir mai:
1️⃣Kazu pozitivu 2, husi Aldeia Loron matan, Suku Madohi. Pozitivu hirak ne’e kontaktu-besik ho sira nia familia uma-laran.
2️⃣Kazu pozitivu 2, profisionál saúde ne’ebé halo formasaun Emergency Obsterics and Neonatal Care (EMONC) iha HNGV. Sira nain rua kontaktu-besik ho profisionál saúde ida ne’ebé mós halo formasaun hanesan iha HNGV, ne’ebé anunsía pozitivu iha dia 10 de Marsu. Hamutuk hotu sira nain 7 ne’ebé tuir formasaun EMONC no detetadu nu’udar kazu pozitivu.
3️⃣Kazu pozitivu 1, rezultadu husi rastreio aleatóriu iha Aldeia Terra Santa, Suku Madohi.
d) Kazu 1, idade tinan 1 fulan 8, deteta iha fatin izolamentu. Nia bá izolamentu hamutuk ho nia inan, ne’ebé atravesa irregularmente fronteira. Ho nune’e, kazu detetadu ka pozitivu iha Dili husi dia 7 de Marsu to’o ohin, hamutuk hotu 53.
Kazu detetadu 53 ne’e fahe ba grupu 14, namkari iha instituisaun 3, eventu 1 no Suku 6 iha Postu Administrativu Dom Aleixo, nomós Postu Administrativu Vera Cruz.
Aproveita esplika mós ba populasaun katak, HNGV funsiona hanesan baibain, hakarak mós partilla ho públiku, dadus balun husi atividade HNGV horiseik iha dia 12 marsu (sura husi tuku 6 dader horiseik, to’o tuku 6 dader ohin)
➡️Total pasiente ne’ebé baixa: 223
➡️Total pasiente ne’ebé mai iha Banku Urjénsia: 100
➡️Total pasiente hemodiálise: 36
➡️Total operasaun urjénsia:9
➡️Total inan ne’ebé partus: 16
➡️Total ema ne’ebé liu husi rastreiu vijilánsia epidemiolójika molok tama ba ospitál laran 395 (111 pasiente, 284 vizitante sira). Husi sira ne’e, iha na’in 20 maka tenki hasai amostra tamba hatudu sintoma infesaun respiratoria aguda
➡️Horikalan deit iha funsionáriu 89 maka serbísu iha ospitál laran tomak, dala ida tan, ospitál nasionál funsiona hanesan bai-bain.
✅ROGRESU HUSI ATIVIDADE PREVENSAUN NO MITIGASAUN SURTU COVID-19 IHA MUNISÍPIU COVALIMA
1️⃣Hanesan relata ona horiseik, atividade iha Suai vila, no postu administrativu sira, eseptu Fatumea la’o normal fali ona.
2️⃣Kazu pozitivu 2 foun, ne’ebé anunsía iha dia 11 de Marsu, halo deit izolamentu iha Fatumea.
3️⃣Sentru Saúde sira iha MunisÍpiu Covalima, ho mós ospitál referénsia suai nafatin hala’o atividade vijilánsia sentinel.
✅PROGRESSU ATIVIDADE PREVENSAUN NO MITIGASAUN SURTU COVID-19 IHA MUNISÍPIU SIRA SELUK NO RAEOA.
1️⃣Ekipa konjunta saúde iha Munisipiu Baucau, husi dia 10 de Marsu & 11 de Marsu foti 132 amostras, iha atividade buka-tuir kontaktu-besik husi kazu pozitivu sira iha Dili, atividade vijilánsia sentinela, no mós atividade rastreiu aleatóriu ba ema ne’ebé bá husi Dili iha dia 8 de Marsu, molok hahú serka sanitaria iha Dili. Husi amostra hirak ne’e 92 negativu, 37 maka sei hein rezultadu, no nain 2 maka pozitivu. Sira nain rua ne’ebé pozitivu:
➡️Estudante medisina na’in ida ne’ebé halo estájiu iha ospitál referénsia Eduardo Ximenes Baucau. Kazu detetadu ida ne’e, hela iha Dili, Aldeia Monumentu Kalma, Suku Lahane Oriental, Postu Administrativu Na’in Feto. Nia pozitivu tamba kontaktu-besik ho profisionál saúde ne’ebé anunsia iha dia 10.
➡️Estudante na’in ida ema Baucau, estudu iha Instituto Ciencias Saúde. Iha Baucau hela iha Aldeia Caibilale, Suku Caibada, Baucau Vila. Iha Dili, hela iha Aldeia Fomento 3, Suku Comoro. Kazu pozitivu ida ne’e, sai husi Dili bá Baucau, maibé iha Dili nia hela hamutuk ho ema ne’ebé iha kontaktu-besik ho kazu pozitivu ne’ebé antes ne’e relata tiha ona.
1️⃣Ekipa konjunta saúde Munisípiu Baucau ohin rekolla tán ona amostra hamutuk 65 husi kontaktu-besik ba kazu pozitivu ne’e.
✅DADUS JERAL:
1️⃣Kazu foun: 8.
2️⃣Kazu rekuperadu: 2.
3️⃣Kazu ativu: 82.
✅ESPLIKASAUN ADISIONÁL
1️⃣Fo’o hanoin ba populasaun katak Rezolusaun Governu Nº12/2021, 8 de Marsu kona-ba serka sanitaria iha Munisipiu Dili, proibi ema atu tama sai husi Dili. Hotu-hotu tu’ur hakmatek iha fatin.
Autoridade ne’ebé bele autoriza ema nia movimentu maka Brigadeiro General Aluk, Diretor Centro Integrado Gestão de Crises. Resolução Governo ne’e mós obriga sidadaun hotu iha sidade Dili, atu halo konfinamentu domisiliáriu jeral. Ida ne’e signifika, hela iha uma, labele sai. Sai deit wainhira presiza tamba moras, hola hahán, ou sira ne’ebé halo servisu esensiál.
2️⃣Informa mós ba públiku katak hahú ohin, dia 13 de Marsu, hamosu ona korredor abastesimentu ba sasán atu sai husi Dili, no tama mai Dili. Pedidu autorizasaun hotu tenki diriji ba Brigadeiru Jeneral João Miranda ‘’Aluk’’, Diretor Centro Integrado de Gestão de Crises- Sala de Situação.
✅APELU
Apela ba populasaun Timor-Leste tomak, atu nafatin hakmatek. Maski kazun konfirmadu aumenta ba beibeik, no naklekar mós on aba munisipiu Baucau, husu atu tu’ur nafatin hakmatek, atu nafatin matan-moris neon nain, lalika sé tilun ba lia-anin ka rumores, pratíka nafatin medida sira ne’ebé ita hotu hatene ona:
➡️Uza máskara
➡️Fase liman bebeik ho sabaun ka dezinfetante ruma
➡️Evita kose liman ba matan, inus ho ibun
➡️Wainhira kumprimenta malu, lapresiza kaer liman, bensa-liman, rei-malu ka haku’ak-malu
➡️Evita halibur malu barak
➡️Hamriik ka tuur dook husi ema seluk, mínimu metru ida ho balun.
May be an image of one or more people, people standing and text that says "da Saúde Ministério B GRADO GESTÃO DE LA DE SITISYÃO SITL ÃO entrr C Sentru Dr. Rui Maria de Araújo Atendimentu 119 Ofisiál Sala Situasaun-Sentr Integradu Jestaun Krize"
Share via
Copy link
Powered by Social Snap
COVID-19 Timor-Leste

FREE
VIEW