===KONFERÉNSIA IMPRENSA===
23 fevereiru 2021 17:30
Dr. Rui Maria de Araújo
Kordenaór Forsa-Tarefa ba Prevensaun no Mitigasaun Surtu COVID-19
Ofisiál Sala Situasaun-Sentru Integradu Jestaun Krizi (SS-CIGC)
✅Atualiza kazu konfirmadu pozitivu Covid-19
Ohin 23 fevereiru 2021, hodi Sala Situasaun, Sentru Integradu Jestaun Krizi (SS-CIGC) nia naran, hakarak hato’o ba jornalista, no públiku tomak, informasaun hanesan tuir mai:
✅DADUS JERÁL
1️⃣ Kazu konfirmadu foun : 4
2️⃣ Kazu rekupera : 0
3️⃣ Kazu ativu : 25
4️⃣ Total ema iha kuarentena : 190
✅APROVEITA MOS ATU SALIENTA PONTU HIRAK HANESAN TUIRMAI NE’E:
1️⃣Kazu konfirmadu foun 4, sira hotu husi Aldeia Klauhalek, Suku Belulik Leten, Postu Administrativu Fatumean, Munisípiu Covalima.
2️⃣Kazu hirak ne’e deteta hahú husi amostra rastreiu ka screening ne’ebé foti iha dia 20 fevereiru 2021, hafoin, ohin loron ekipa vijilánsia epidemiolójika buka tuir ninia kontaku sira to’o ohin loraik hamutuk ema na’in 29, membru familia na’in 13, viziñu na’in 16. Na’in 3 ne’ebé pozitivu tan, ida membru familia, nain rua seluk viziñu.
3️⃣Kazu sira iha leten hatudu transmisaun lokál husi possivelmente kazu ‘’importadu klandestinamente’’ husi populasaun ne’ebé tama sai fronteira.
4️⃣Ekipa vijiánsia epidemiolójika ho ekipa laboratóriu nafatin buka tuir kontaktu sira hodi halo análize ba sira-nia amostra.
5️⃣Hare husi níivel alerta no resposta ne’ebé Governo Timor-Leste adopta ba prevensaun no mitigasaun Covid-19 iha Timor-Leste, hahú ohin 23 fevereiru 2021, Timor-Leste tama fali faze ne’ebé hanaran ALERTA 3 ka faze ‘’mitigasaun.” Serka Sanitária sei matein nafatin, tuir rezolusaun governu nº4 & nº5, 15 Fevereiru 2021.
6️⃣Kazu foun 4 ne’e oras ne’e dadaun Servisu Ambulánsia ba foti atu lori mai izolamentu iha Vera Cruz.
7️⃣Aproveita mos oportunidade partilla ho públiku rezultadu jerál rastreiu ka screening ne’ebé halo iha Munisípiu Covalima, Bobonaro ho RAEOA:
a) Bobonaro totál amostra 1022, 100% negativu
b) Covalima totál amostra 851: Pozitivu 4, negativu 847 amostra (99%).
c) RAEOA totál amostra 252, 100% negativu.
Informa moos katak, rastreiu sei nafatin hala’o to’o dia 25 fevereiru iha Covalima no Bobonaro, hodi bele kobre Postu Administrativu sira ne’ebé seidauk kobre, nune’e mós ho RAEOA, ne’ebé sei hala’o to’o dia 27 fevereiru
✅APELU
Maski kazu foun hirak ne’e hatudu katak iha agrupamentu ida ka ‘’cluster’’ ida, iha aldeia Klauhalek, Suku Belulik Leten, Fatumean, no hatudu katak iha transmisaun lokál, iha fatin ne’ebá, SS-CIGC hakarak apela ba populasaun tomak, atu kalma, labele pániku, no buka kumpri nafatin ho disiplina buat hirak hanesan tuir mai:
1️⃣Hamri’ik do’ok husi ema seluk, minimu metru ida ho balun,
2️⃣Kumprimenta malu lapresiza bensa-liman, lapresiza kaer-liman, lapresiza haku’ak-malu ka rei-malu
3️⃣Uza máskara
4️⃣Fase-liman beibeik ho sabaun, ka uza dezinfetante liman-nian
5️⃣Lapresiza sai husi uma, wainhira la presiza tebes. Wainhira ita hotu hala’o ho disiplina buat hirak hanesan temi iha leten, ita hotu sei kontribui atu ita-nia an-rasik, ita-nia família no viziñu sira iha ita-nia bairru ka ita-nia serbísu-fatin, nomós Timor-Leste tomak, nafatin dook husi moras Covid 19.
#MédiaPaláciodasCinzas
