COVALIMA, 01 marsu 2021 (TATOLI)- Ekipa Vijilánsia no Epidemolojia ho Laboratóriu Ministériu Saúde, segunda ne’e, kontinua halo screening masál ba estudante sira iha Eskola Bázika Filiál (EBF) Salele, Aldeia Faulara, Suku Maudemu, Postu Administrativu Tilimor, Munisipiu Covalima.
Xefe Ekipa Vijilánsia no Epidemolojia ho Laboratóriu Munisipiu Covalima, Serafin Moniz, informa estudante na’in-28, inklui diretór eskola no profesór ida tenke teste hotu, tanba sira halo kontaktu ho pasiente estudante feto ida ne’ebé pozitivu COVID-19.
Ekipa Vijilánsia no Epidemolojia ho Laboratóriu Ministériu Saúde halo screening masál iha Covalima. Imajen Tatoli/Eugénio Pereira
“Ami kontinua foti amostra ba estudante na’in 28 iha EBF Salele, tanba iha nia pasiente estudante ida pozitivu COVID-19 ne’ebé halo kontaktu ho estudante no mestre sira,” Serafin Moniz informa ba jornalista sira iha Salele.
Medida foti amostra ne’e ekipa halo hodi salva estudante hosi transmisaun surtu COVID-19 ba ema seluk.
Ba estudante sira ne’ebé identifika sintoma COVID-19 sira sei lori nia amostra ba teste iha laboratóriu maka identifika sira sofre, ekipa médiku sei halo atuasaun urjénsia.
Iha parte seluk, hafoin identifika abitante na’in-10 pozitivu COVID-19, to’o ohin ekipa rekolla ona amostra hamutuk 525 hosi área Salele no Fatumean nian ne’ebé identifika halo kontaktu ho pasiente COVID-19.
Iha parte seluk, Diretora Sentru Esperansa ba Feto Salele, Madre Santina Imaculada de Oliveira, SSpS, hato’o agradese ba ekipa médiku ne’ebé rekolla amostra
COVID-19 ba abitante na’in-75 ne’ebé hela iha Sentru Esperansa ba Feto Salele.
Abitante na’in-75 kompostu hosi labarik na’in-54; feto 49, mane na’in lima (5), traballadór na’in-15 inklui Madres sira hamutuk na’in-neen (6).
Madre Santina dehan, sira nia parte maka husu ekipa médiku rekolla amostra hodi bele halo identifikasaun ba sira nia saúde karik identifika moras COVID-19 bele halo prevensaun.
Madre Santina agradese servisu ne’ebé Ministériu Saúde hala’o iha Covalima importante tebes hodi salva saúde públiku.
Abitante sira ne’ebé hela iha Sentru Esperansa ba Feto mai hosi Munisípiu sia (9) hanesan, Dili, Covalima, Baucau, Viqueque, Manufahi, Ainaro, Liquiça, Bobonaro no Manatuto.
Jornalista : Eugénio Pereira
Editór : Francisco Simões
