COVID-19: pozitivu 13, baixa aumenta ba 48 – TATOLI

DILI, 09 marsu 2021 (TATOLI)—Sala Situação Centro Integrado Gestão de Crises (SS-CIGC sígla portugés), atualiza hikas kazu pozitivu COVID-19 foun hamutuk 13, ne’ebé deteta liu hosi teste iha loron-sira antes.

Vise-Koordenadora Forsa-Tarefa ba Prevensaun no Mitigasaun Surtu COVID-19, Odete da Silva Viegas, esplika hafoin deteta kazu foun-rua iha bairru BTN II, Tasi Tolu, Suku Madohi, Postu Administrativu Dom Aleixo, to’o horisehik ekipa konjunta saúde buka-tuir nafatin kontaktu-besik hosi kazu rua ne’e.

“Hosi ezersísiu ida ne’e, ohin ita deteta tan kazu sia hosi kontaktu-besik ho kazu hosi sidadaun ida-ne’ebé nu’udár funsionáriu administrasaun públika iha Sekretária Estadu Formasaun Profisionál no Empregu (SEFOPE),” Odete hateten.

Alende ne’e, iha kazu pozitivu ida hosi Bebonuk ne’ebé relata horisehik 8 marsu, hosi kazu ida ne’e ekipa konjunta saúde halo kedan rastreiu, no rezultadu deteta tán kazu ida hosi Bebonuk.

Iha sorin seluk, ekipa konjunta saúde halo mós rastreiu iha fatin risku iha Ospitál Nasionál Guido Valadares, deteta kazu tolu.

“Kazu tolu iha Ospitál Nasionál ne’e profisionál saúde ho nia-oan na’in-rua,” nia subliña.

Odete aproveita mós oportunidade ida-ne’e atu informa ba públiku katak, atividade rastreiu seletivu massa horisehik 8 marsu, amostra ne’ebé ekipa foti hamutuk 471.

Hosi SEFOPE amostra ne’ebé rekolla hamutuk 28, Ministériu Transporte no Komunikasaun (MTK) hamutuk 137, TIC 46, Bebonuk 51, Ministériu Finansa 82, Ospitál Nasionál Guido Valadares 3 no Gabinete Primeiru-Ministru 124.

“Ohin, ekipa konjunta saúde kontinua nafatin buka tuir kontaktu-besik iha SEFOPE, MTK, HNGV nomos Bebonuk. Ita hein rezultadu iha loron hirak tuir-mai,” nia dehan.

Dadus loron ohin nian, kazu foun 13, kazu rekoperadu 0, kazu ativu ne’ebé baixa iha sala izolamentu hamutuk 48.

Governu Timor-Leste to’o ohin loron konsege kontrola kazu Covid-19, no seidauk iha ema ne’ebé mak mate, inklui seidauk iha ema ne’ebé ho moras grave.

“Ida ne’e hatudu susesu ida ne’ebé mak di’ak tebes ba Timor-Leste nomos ba povu tomak. Atu bele hetan susesu ne’ebé mak di’ak, ita presiza kontribuisaun koletivu ida atu nune’e ita bele hapara transmisaun lokál iha ita-nia rai-laran,” Odete espresa.

SS-CIGC husu mós ba entidade hotu-hotu, populasaun ka komunidade atu bele kumpri medida prenvensaun COVID-19.

Husu ba populasaun iha Dili laran tomak atu nafatin kalma, lalika pániku, hela deit iha uma bainhira laiha nesesidade atu halo movimentu bá-mai, pratíka nafatin medida sira hanesan uza máskara, fase liman beibeik ho sabaun, bainhira kumprimenta-malu, la presiza kaer-liman, bensa-liman, rei-malu ka haku’ak malu, evita halibur malu-barak, hamri’ik ka tur dook husi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

Share via
Copy link
Powered by Social Snap
COVID-19 Timor-Leste

FREE
VIEW