DILI, 12 marsu 2021 (TATOLI)-–Autoridade munisipál koopera hamutuk ho Polísia munisípiu Aileu, blokeia ona estrada dirasaun ba munisípiu Dili no bandu abitante sira labele halo movimentu.
Administradór munisípiu Aileu, Abel da Conçeicão, hateten, tanba haree ba munisípiu ne’e iha ligasaun direta ho munisípiu Dili, maka deside blokeia estrada atu komunidade sira labele la’o livre bá-mai área ne’ebé Governu impoin ona serka sanitária no konfinamentu obrigatóriu durante loron hitu, hahú hosi loron 09 to’o 15 marsu.
“Ami hamutuk ho parte Polísia munisípiu Aileu taka dalan asesu ba Dili no tau postu provizóriu iha ne’ebá atu haree abitante ne’ebé mak tenta atu ba Dili no mai Aileu iha ámbitu aplika serka sanitária,” Administradór Aileu informa ba ba Agência TATOLI, via telefónika, sesta ne’e.
Tuir Administradór, daudaun parte saúde Aileu kontinua halo sosializasaun ba komunidade atu bele hakmatek iha fatin ida-idak kuandu laiha nesesidade atu sai.
Aleinde ne’e, Eis Diretór ba Diresaun Nasionál Promosaun Dezenvolvimentu Média Lokál (DNPDML) ne’e dehan, kontinua hamutuk ho saúde munisipál atu disemina informasaun ba prevensaun surtu COVID-19 ba komunidade kada postu atu mantein kumpre regra saúde hanesan uza maskára, fase lima bei-beik no mantein distansia sosiál.
Aleinde ne’e, autoridade hamutuk ona ho Diretór Saúde Aileu no Komandante Polísia fahe ona máskara ba pasajeiru transporte públiku ne’ebé movimentu iha kapitál Aileu.
“Ita fahe máskara ba sira atu komunidade konsienta katak uza maskára, fase lima bebeik distánsia sosiál hanesan parte ida halo prevensaun surtu COVID-19.
Daudaun ne’e, Atividade sira munisípiu Aileu la’o normál hanesan servisu administrasaun públiku, atividade prosesu aprendizajen, merkadoria no seluk tan, maibé nafatin kumpre regra Estadu Emerjénsia ba dala-11.
Jornalista: Florêncio Miranda Ximenes
Editora: Julia Chatarina
