14 janeiru 2021, Diretóra Jerál Prestasaun Saúde (DJPS) no Kordenadóra Jerál Komisaun Covid-19 Ministériu Saúde Dotóra Odete da Silva Viegas hala’o enkontru Komisaun Kordenasaun Nasionál ho Grupu Traballu Tékniku ba introdusaun vasina COVAX iha Timor-Leste.
Sorumutuk ne’e iha salaun Palácio das Cinzas Ministériu Saúde Caicoli Dili.
Depois diskuti tiha faze preparasaun sira no introdusaun spesifikasaun vasina kontra SARS-Cov-19 nian iha semana hirak liuba ho preferensia vasina ho grupu prioridade disidi nue’e mós proposta vasina COVAX dezenvolve no submete ona. Iha Loron 8 janeiru 2021 Ministériu Saúde hetan ona konkorensia husi reuiaun Konsellu Ministru ba introdusaun vasina COVID-19 ida ne’ebé hetan mós apoiu husi Global Alliance for Vaccine and Immunization (GAVI, sigla inglés) COVAX Facility.
Iha ámbitu sorumutuk ohin nian ko’alia kona-ba etapa sei hala’o tuirmai maka dezenvole Planu Introdusaun Vasina Nasional inklui kustu, asegura kustu operasionál hodi kobre vasinasaun ba 20% populasaun, asegura kustu ba vasina no operasionál ba vasinasaun restante 80% populasaun, prepara ba kestaun indenifikasaun no liabilidade (karik presiza).
1️⃣Identifika grupu prioridade
2️⃣Identifika plataforma delibarasaun vasina
3️⃣Dezenvolve mikroplanu introdusaun vasina ba instituisaun idak-idak
4️⃣Dezenvolve planu Rekursu Umanu, treinamentu, komunikasaun
4️⃣Halo estimasaun ba kustu operasionál
Planu ba-oin komisaun kordenasaun nasionál ho gupu traballu atu prepara maka submisaun online Planu Nasional Introdusaun Vasina (PNIV): sei hahú aban 15 janeiru 2021. Hafoin submisaun, organizasaun Mundiál Saúde (OMS/WHOTL, UNICEF, GAVI no Komisaun Rejionál sei revee Planu Nasionál Introdusaun Vasina.
Iha área haat mak Komisaun Rejionál ne’e sei haree mak hanesan disponibilidade espasu, korenti malirin, prioritizasaun grupu alvu, planu seguransa vasina no disponibilidade kustu operasionál.
Bainhira komisaun ne’e aprova ona PNIV, COVAX sei aloka vasina ho planu distribuisaun pursentu-20 (20%) ba populasaun, posivelmente sei simu uluk vasina pursentu-3 ba populasaun iha fulan 2 to’o 3 nia laran depois de submisaun planu refere ba Covax facility. Maski nune’e, tempu fiksu ba deliberasaun vasina seidauk klaru.
#MédiaPaláciodasCinzas
