===KONFERÉNSIA IMPRENSA===
14 fevereiru 2021 11:30
Dr. Nilton do Carmo da Silva, Spot.MBiomed
Kordenadór Pilar VII COVID-19
✅Dadus 14 fevereiru 2021
1️⃣Komulativu Kazu : 102
2️⃣Kazu Foun : +1
3️⃣Atuál Baixa : 40
✅Atualiza kazu pozetivu foun Covid-19
Ohin 14 fevereiru 2021 husi komisaun nasionál rejista tan kazu konfirmadu pozetivu Covid-19 Timor-oan na’in 1. Pasiente ne’e mane ho idade 20, asimtomátiku.
Iha 5 fevereiru 2021 nia sai husi Timór ba Atambua Indonézia liuhusi dalan ilegál ho objetivu bá vizita família (Inan-kiik) mate no hela iha nebá durante loron 5.
Iha 10 fevereiru nia fila husi Atambua mai Timor-Leste nafatin liuhusi dalan ilegál área Tunibibi nian, Munisípiu Bobonaro.
Iha Tunubibi nia bá Maliana vila ho motór (ojek) maibé nia lakuñese, husi Maliana vila kontinua viájen ba Postu Administrativu Bobonaro ho Angguna (transporte públiku). Iha Angguna laran iha pasajeiru hamutuk ema na’in 11 inklui motorista no ajudante (konjak).
To’o iha área Suku Lourba, Bobonaro sidadaun ilegál ne’e nomós pasajeiru na’in 4 tun husi angguna kontinua bá to’o iha postu Bobonaro Vila.
Ilegál ne’e informa katak Iha Bobonaro nia hela mesak iha nia uma no la iha família ida hela ho nia. Loron tuir mai komunidade iha área nia hela informa ba autoridade lokál nomós seguransa polísia ho parte vijilánsia Munisípiu foti kedas sidadaun ne’e mai eskuadra PNTL Maliana vila hodi halao investigasaun.
Remata tiha investigasaun iha 11 fevereiru ekipa vijilánsia Munisípiu nian lori sidadadun refere bá iha kuarentena Batu-Gede.
Swab teste foti 13 fevereiru no rezultadu pozetivu relata iha dia 13 fevereiru.
Serbísu vijilánsia Munisipál Bobonaro ho autoridade seguransa iha Maliana identifika no hetan ona kondutór angguna ho nia ajudante ida-ne’ebé tula Ilegál pozetivu Covid-19 no submete ona ba kuarentena Batu-Gede. Dadaun ne’e ekipa sei buka tuir (contact tracing) passajeiru hotu iha angguna refere, iha balu ekipa identifika ona no ekipa kontinua buka tuir nafatin.
✅Atu dehan de’it katak solusaun di’akliu ba ita-nia komunidade no ita-nia nasaun Timor-Leste maka sidadaun hotu tenki hakmatek iha fatin, labele hakat fronteira tama no sai, tamba atetudi ne’e sei lori perigu boot ba populasaun tomak iha Timór.
Iha inísiu kedas Covid-19 ne’e mosu iha ita-nia rai to’o agora ho ita-nia serbísu maka’as ohin loron hodi laiha transmisaun iha komunidade, maibé ho maneira ema ida-rua ne’ebé laiha responsabilidade, transmisaun lokál ka transmisaun komunidade bele mosu iha tempu saida deit.
#MédiaPaláciodasCinzas
